Thursday, March 31, 2011

日記叄拾貳

是日午餐:
香菇金針雲耳蒸雞脾
除咗雞脾外其他都有用老干媽撈過(又係老干媽)
仲有白飯同菜。

今日應該做咗人生最後一個presentation。
以後都冇機會啦,有D失落添...
希望嗰mark會唔錯啦!

Wednesday, March 30, 2011

日記叄拾壹

今朝好有閒情咁煎pancake 食,可惜閒情過度煎黑咗,唉。
因為咁,我個pancake 唔係用刀叉食,而係用湯匙食嘅(笑)。
黑到呀...不過幾圓喎~

又,今晚食意粉呀,不過餓到連影相都無力,居然影五張震五張!?
所以無相啦。

又,星期五一班朋友諗住食飯,限時少於兩個鐘(包車程),
請問又點食得切 Japanese All U can Eat 呢?
你估D壽司唔冼時間包嘅? 唉...你估我唔想去咩。

Tuesday, March 29, 2011

日記叄拾

今日忍唔住去行街街。
不斷聽到 Rihanna 首歌,仲要係响唔同鋪頭喎!


是日晚餐:
麻油雞

最後附上老公主
一副enjoy 嘅樣(笑)。

莫卡巧遇同鄉

正所謂"四海之內皆兄弟",
莫卡王子响呢個周未就巧遇到兩位姐姐。

話說星期六去超市買古古力奶同放狗,去買奶途中突然出現一隻細腸!?
隻細腸同王子一樣都係啡色短毛,但size 就細2個碼到啦。
身上無着任何衫,只有紅色狗帶背心,但王子仍然着住佢件黃色戰衣(笑)。
唉,估唔到王子牛高馬大都比不上人地女仔...

細腸主人一路同我傾計一路想兩條腸交流吓,
可惜神女無心,襄王亦無夢 =零交流。
最後,細腸主人講笑咁問咗句王子唔會剪咗啩 (係,王子已經...),就帶住細腸走咗啦。
呢個時候嘅我,望住同諗住嘅其實係老遠嗰隻牧羊狗,真係好靚...

又,第二日帶王子去附近細街行一行。
行到中途突然有人大叫"Excuse Me!"
邊個?邊到?
見到有位太太响自己間屋門口問
" Is that a weiner dog?"然後慢慢行過嚟,同時叫佢隻腸仔出嚟。


Alice 係一隻女鋼腸,四歲啦!
雖然佢係鋼腸,但佢D毛好軟滑架!
佢唔怕人亦唔怕狗,但王子佢就繼續吠吠吠...
皆因Alice嘅成家人出曬嚟,仲有兩個小小小朋友添!
女主人一路同男主人研究王子嘅舉動,一路話ALice細個都係咁,大D就無問題。
希望係真啦!
跟住佢叫佢大仔去摸王子等王子習慣小朋友,
當然係失敗啦...王子一路吠一路後退,甚至坐定定唔肯郁。
呢個時候Alice 就一直親王子嗰頭,眼,耳仔,鼻,好似响到幫佢打打氣。
傾多一陣,我地就返屋企啦!

Monday, March 28, 2011

日記貳拾玖

終於做完一份功課,仲有一個 Group Presentation我KO咗我個大學生涯啦!
又,經過半年嘅等待,我終於收到退 Dental Plan 嘅錢,感動!

今日午餐係求其米粉求其到影咗相都唔想放....
皆因我唔記得米粉係吸濕大笨象,仲醒到中途覺得太多水倒咗好多去(笑)。
結果變咗老干媽撈米(爆)。
希望支老干媽可以挨到四月底啦!

用老公主張相代替。
唔記得因咩事佢咁傷心,
估計離唔開俾我鬧完。
事關公主最近神經緊張,咩都叫一餐...
仲要累到對面隻狗俾主人打。

晚餐:
咖哩豆腐瓜...太辣添。
我係專登整爛D豆腐嘅。

日記貳拾捌

今日又係甜品日,
仍然係去 patisserie la cigogne 到買。
叫咗三個未食過嘅:

白色嘅 Raspberry  Cheese Cake
啡色嘅 The Africa
同綠色嘅 Croq-Pistache
我最鍾意 Raspberry Cheese Cake, 有D酸酸地令到件 cake 唔會過甜。

晚餐由Chef Yan煮中菜,
有我嘅愛菜: 沙茶醬炒A菜,
 花生醬蛋面(?)

 同炆豬梅肉,超淋超下飯!

關於莫卡巧遇同鄉日記將會另開一個專題後補,
只可以講,後悔自己盡責過度將所有野攬上身T.T
希望好人有好報(笑)。

Saturday, March 26, 2011

日記貳拾柒

是日午餐去咗朝鮮屋。
叫咗豬骨湯,豬血糯米腸加豬雜湯同韓式冷面。
豬骨湯同冷面都係必點嘅。
冷面真係好好食架!雖然無料(得蛋,醃蘿蔔,青瓜同水梨一片),但真係好有味!
豬骨湯無味精得嚟又好有層次嘅味。
而今日試嘅新野都好好味,
試過咁多次係無一次令人失望架!




 晚餐係由病緊嘅Chef Yan煮嘅。
香濃蕃茄甘荀湯

唔知點形容嘅前菜:
有beets,長豆同皇子菇,
sauce係aged balsamic vinegar 同olive oil 
D菇超好味,可惜今次買嘅 beets唔夠甜... 

最後係色彩豐富又好味嘅焗豬柳
左邊係蜜桃蘋果而右邊係焗甜蕃薯
D豬柳好淋架!!!

Friday, March 25, 2011

日記貳拾陸

昨日太夜返屋企嘅關係,無咩時間寫日記。
其實尋日下午同室友仔去咗方一行街。
行咗大量時裝鋪,順便幫室友仔買衫。

是日午餐:
有菜魚菇少許
 及太陽蛋面一隻

今日唔冼返學,所以有瞓到自然醒嘅打算。
可惜事與願違,老公主七點幾就開聲練歌...
最後我都係同返學差唔多時間醒(哭)。

然後下午去超市買野嘅時候有大量奇怪事情發生。
首先泊車時前面位婆婆唔睇車就倒車,所以我地被迫拋棄原有車位閃走。
然後D環保袋離奇消失剩一個,其他嗰D去咗邊呢?
人證一話所有袋都帶咗出街...
唔通佢地有腳?

試咗"新"餅乾
唔,咪就係牛油餅乾...無咩特別。

 晚餐係
雙瓜冬菇粉絲肉碎煲

Thursday, March 24, 2011

日記貳拾伍

今日做完運動嘅食糧係
雪耳糖水,用咗黑糖所以係咁嘅顏色。

午餐:
又係排骨同李錦記(笑)
令我諗起我細個嘅時候成日以為李錦聯係李錦記嗰老闆,
仲要唔明點解堂堂老闆要响都市閒情教人煮餸...
休息啦~

Wednesday, March 23, 2011

日記貳拾肆

早餐:
芝士Pancake
晨早煮早餐就算唔好食,硬係要擺靚D去影相

晚餐:
韓式烤三文魚

同大大煎餅
材料豐富,再配上茄汁同老干媽享用。
仲有飯後飲一杯:有鴛鴦加朱古力粉加五榖粉。
嘆~
繼續做assignment (哭)。

 今日超大雪...唔係春天啦咩?
睇吓老公主塊面幾多雪!

Tuesday, March 22, 2011

日記貳拾叄

又係日出,見到枝牙簽嗎?係CN Tower 黎架。

今日放學去Wal-mart買嘢...
順路去1蚊店睇野,見到有個好細嘅有蓋碗好得意,
諗住拎上手睇吓,悲劇就係咁發生啦。
嗰蓋跌咗落地然後屍首異處...
我望吓隔離嗰staff無反應,急急腳逃離現場。
對唔住! 

試咗兩個新食物:

Hazelnut Mocha Biscotti
一包六條,食落唔錯。
再懶係有情趣咁冲咗Latte Caramel配Biscotti做午餐。
幻想下自己係闊太食緊tea(笑)。  

做完闊太返回現實做妹仔...
陪公主去散步。

最後係豐富晚餐:
豬骨湯味出前一丁
見唔見到今日張相有咩特別?
哈哈,多咗自製道具一個!

迷路

我唔係一個路癡。
我只係唔認路啫。
你俾地圖我,我就唔會行錯路。
大前題係要有地圖,不過有邊個成日帶地圖架?

好記得第一日住宿時,放學後由library行返屋企( town house)。
由於第一日到學校,所以抱住有路就行嘅態度。
首先我行咗去學校外圍,然後望住個地圖估下自己响邊。
跟住行下行下,我直頭行咗出學校範圍外條大馬路到。
見到咁多車覺得唔對路,又望吓地圖先行番入宿舍地區。
再穿過小路,終於見到屋企啦!
我用咗九個字由學校行番宿舍呀(笑)。

又,第二年搬咗出去住。
話說我呀哥已經教咗我望住嗰 city hall行就會返到屋企啦, 心諗實冇問題嘅。
結果,我望住cinema 嗰出口無出而選擇咗Old Navy。
然後望住一望無際嘅停車埸,嘆一口氣,繼續上路。
行呀行呀行到去商業區,連人影都無。
我終於知我行錯方向啦,所以打咗俾阿哥要佢指引正路。
原來我行錯咗方向(笑)。
結論係:無地圖有電話都好有用。

自此以後都無再行錯路啦!
不過間唔中去完商場冼手間都會搵唔到出口。
最記得有次走咗入後樓梯發現行錯路,
推門出返去搵返正路時連清潔叔叔都笑住咁指我去商場出口。

我好有信心以後都唔會再迷路嘅!

Monday, March 21, 2011

老公主隨影

繼續練習
註:老公主瞓咗响地下。
想瞓,打呵欠。

半瞓狀態

出街開心到要咪眼笑。


日記貳拾貳

尋日又帶王子去巡視領土。
着咗件低胸外套驚佢凍。
請忽略我嗰對閃到無得再閃嘅鞋同短小嘅肉腳。
 好似隻伸個頭出嚟嘅烏龜(笑)。

晚餐
香菇腐皮卷
有陣時試新野並非好事,不過我會繼續尋找好食嘅腐皮卷!


Sunday, March 20, 2011

日記貳拾壹

先送上某日嘅早晨

今晚晚餐依然係Chef Yan 煮。

煙三文魚青木瓜沙律
檸味十足!我愛青木瓜~

 蜜糖芥茉煎雞胸(?)
有D似檸檬雞味,不如下次整檸檬炸雞啦。

 碎牛炒飯
粒粒分明,好香蝦味!
而且冇用左我最憎嘅青豆,多謝哂(笑)。

 甜品:
香蕉面包?蛋糕?
未食,期待中。

森石餐廳

今日午餐去咗森石。
通常我地諗唔到食咩就會嚟森石,因為抵食同少地雷。

叫咗:
紫菜魚腐湯米
紫菜係一塊塊嘅即食紫菜...爭D以為自己食緊日式拉麵。
魚腐係自製?咬開會見到一大粒豆腐架,都唔知係好事定壞事(笑)。

  必叫海南雞飯,
量多,最鐘意佢嗰兩個沾醬。

 沙爹牛肉炒河
唔....你當佢係乾炒牛河加菠蘿啦。
地址: 20 Apple Creek Blvd Unit 2, Markham
消費: $8.5/ person
味道: 3    /5
服務: 3    /5
整體: 3    /5


Saturday, March 19, 2011

日記貳拾

我認我唔係一個斯文人。
每一套睡衣俾我着過都無好結果。
有兩件陪我過咗3年嘅上衣都係同一死狀:
左手肘有一個面積大過手掌嘅窿。
根據專家嘅估計,原因係長時期用左手挨住書枱令到個窿形成。
又,有無數條睡褲因為有大小不同嘅窿...
又係窿,我身有角咩?定每逢夜晚就變人狼整爛件睡衣(哭)。

今日換衫嘅時候發現條褲有兩個窿啦。
而上衣呢, D鈕會自動解開(笑)。
係我渣定套睡衣渣呢?

是日晚餐:
炸蠔伴粟米湯

毛豆洋葱蓉伴油封雞
Chicken Confit with edamame and onion and mushroom puree


煙三文魚薯餅

感謝大廚!






The Copper Chimney @ Toronto

一開波就先叫兩杯飲
Mango Lassi
味道不錯,少冰仲好。

Papadum
招待小食,少少咸多多脆,
嗰沾醬帶辣但係係開胃清爽嘅辣。

Vegetable Samosa
中規中距,無好似另一道前菜咁帶俾我驚喜。

Onion Bhaji
正!超好味!有好香嘅洋葱同咖哩味, 大愛!

Chicken Pasanda 
in special mild cashew nuts and saffron sauce
味濃, 雞肉唔算太乾, 配Naan 唔錯。

Saag Lamb
in baby spinach puree and seasoned with onion based sauce
我嘅特大愛(笑)!羊肉好淋,而且有好濃嘅菠菜同洋葱/牛油味...
超級好食!

Plain Naan and Garlic Naan
好鬆好酥, 但我冇試到 plain naan。

Gulab Jamun
有深度嘅甜品,應該係有玫瑰水嘅糖水。
甜,好甜,俾雪糕仲甜(笑)。

地址: 2050 Avenue Road, Toronto, M5M 4A6
消費: $20/ person
味道: 3.9  /5
服務: 4.5  /5
整體: 4.2    /5

© My Gymnasium @ Toronto 2012 | Blogger Template by Enny Law - Ngetik Dot Com - Nulis