長大

說的是王子。

最近不知道王子遇到什麼事突然變穩定了，

就是那種一夜之間長大了的感覺。

首先王子由早、午、晚各一次放水外加隨心情而定的任何時間放水，

每天都不知用了多少張training pad,偏偏出街就無水出。

現在他不再隨心而放,甚至可以忍到出街先放。

又,以前的王子起床後會咬東東,撞入兔兔的家,

跳上跳落,總之無時無刻都要搗蛋!

但現在的王子起床後會走一走,望吓街,

甚至直接一整天在窗邊曬太陽望街瞓覺。

現在的他進步到自己一個留在家中八小時,

不會咬東西,不會哭,不會亂去廁所..

雖然差不多兩歲才定性,但還是超感動呢!

Woofstock 2011

今日帶了王子去Woofstock 買零食。

夏天的Woofstock都是在St. Lawrence Market 旁邊舉行的。

只是從停車場走到場地的一小段路已經見到無數的大、中、小狗,

而王子每見一隻狗都要狂吠先甘心(笑)。

裏面狗山狗海,大至大丹,小至芝娃娃,

幾乎每一秒你的身邊都有五六隻狗,我對眼很忙而王子的鼻亦都很忙。

王子還遇到很多兄弟姊妹,但貌似王子仍然是最大的一只,

而且不只一次被問到是否Miniature,哈。

賣的品種沒有很多,戰利品也沒有很多,

就是買了些雞乾,鴨乾同豬耳等,

開心啦,王子!

又,王子今日王子病發作。
首先吐出cheap cheap 狗餅,繼而就算是較貴的零食也要專人餵..

專人餵食中

P.S 1:盆Basil開花啦!
P.S 2: 今日食咗龍蝦!正!

回到過去-王子BB

二零零九年十二月,考完試的我滿心歡喜地拉着行李,奔出大廈門到單車男的車

(不是單車,是真的車輛),準備回家過聖誕。

奔跑途中見到有古怪...為什麼車裏有個不熟悉的東東?是什麼來的?

為什麼那個東東有眼耳口鼻的?為什麼它用那可憐的眼神看着我?

狗!

是狗呀!

我呆了...之後怎樣回家,在車上發生過什麼事我都記不起。

蓮花露話當日的我一直坐在車的另一邊說不敢碰他..不敢碰他。

真的,他看來太BB,太小一只了,我怕一碰他他就會香...

這次就是我跟莫卡第一次見面了。

題外話,莫卡是某兩個人在我背後偷偷地去breeder那裡睇狗、選狗的。

然後就在接我回家那一天再早點出門去接狗狗,再帶着他去接我。

而再兩年前的差不多時間,也就是聖誕節,在接我回家的那一天,

他們在我到家放下行李後,放了他們剛領養的兔兔出來迎接我...

多謝你們的驚喜。

回家第一天,傻傻的樣子。

最喜歡做的是躺在人的大腳上睡覺

笫一次真的出街,愛上穿露肩裝。

長大了...

Homer

今日見到第二個朋友-Homer

無見一排,我已經唔認得Homer啦!

佢大隻咗好多呀!

佢同王子玩得好瘋狂,係咁玩呀,跑呀同咬。

好難得遇到一隻狗同王子玩咁耐架!

搞笑嘅係我影任何一張相都見唔到佢隻眼(笑)

送上鮮花相一張。

淘淘

今日終於出街玩啦!
雖然王子唔係太好彩,只係遇到一個朋友-淘淘(請用國語讀出)。


淘淘好可愛架!每次我叫佢,佢都會好用力咁跑過嚟我身邊。
唔似得王子咁叫極都唔理我,哼。
不過淘淘其實唔係太郁,通常都係企响主人身邊...
皆因佢好唔鍾意跑,如非必要,佢都唔郁(笑)。
所以佢有25磅架!連公主比佢高同長,都只係24磅咋!

摺腳王子

我摺，

再摺。

响牀上摺，

响地下摺，

响梳化摺，

出街跑都摺，

最後,合十祈禱,感謝主賜我一雙可以屈90度嘅雙腳(笑)。

機器壞

年紀大,機器壞。

成日淨係响屋企瞓、食、飲水同背書,

唯有用老公主充吓場面啦。

唔知點解嗰新造型越睇越奇怪...

惡搞老公主

你同我講咩呀巴斯?我唔識spanish 架!

雖然我睇唔到嘢,但你唔好睇少我呀........條眉!

斜斜眼

王子佢有大量斜眼相....
我諗要帶佢睇眼科醫生啦(笑)。

我係斜眼王子。影咩呀影!

"快D出門口啦!仲影!"

王子都有落難嘅一日...So?影咩呀你!


最後,牀照一張。

老公主時裝展-4

執野嘅時候發現倉底貨:

聖誕裙

有D奇怪而且唔係好啱身(笑)。

我諗老公主唔係太適合女性化嘅衫,哈。

莫卡巧遇同鄉

正所謂"四海之內皆兄弟",

莫卡王子响呢個周未就巧遇到兩位姐姐。

話說星期六去超市買古古力奶同放狗,去買奶途中突然出現一隻細腸!?

隻細腸同王子一樣都係啡色短毛,但size 就細2個碼到啦。

身上無着任何衫,只有紅色狗帶背心,但王子仍然着住佢件黃色戰衣(笑)。

唉,估唔到王子牛高馬大都比不上人地女仔...

細腸主人一路同我傾計一路想兩條腸交流吓,

可惜神女無心,襄王亦無夢 =零交流。

最後,細腸主人講笑咁問咗句王子唔會剪咗啩 (係,王子已經...),就帶住細腸走咗啦。

呢個時候嘅我,望住同諗住嘅其實係老遠嗰隻牧羊狗,真係好靚...

又,第二日帶王子去附近細街行一行。
行到中途突然有人大叫"Excuse Me!"
邊個?邊到?
見到有位太太响自己間屋門口問
" Is that a weiner dog?"然後慢慢行過嚟,同時叫佢隻腸仔出嚟。

Alice 係一隻女鋼腸,四歲啦!
雖然佢係鋼腸,但佢D毛好軟滑架!
佢唔怕人亦唔怕狗,但王子佢就繼續吠吠吠...
皆因Alice嘅成家人出曬嚟,仲有兩個小小小朋友添!
女主人一路同男主人研究王子嘅舉動,一路話ALice細個都係咁,大D就無問題。
希望係真啦!
跟住佢叫佢大仔去摸王子等王子習慣小朋友,
當然係失敗啦...王子一路吠一路後退,甚至坐定定唔肯郁。
呢個時候Alice 就一直親王子嗰頭,眼,耳仔,鼻,好似响到幫佢打打氣。
傾多一陣,我地就返屋企啦!

老公主隨影

繼續練習

註:老公主瞓咗响地下。

想瞓,打呵欠。

半瞓狀態

出街開心到要咪眼笑。

日記拾柒+莫卡上網(笑)

話說今晚有D時間留意吓工作消息,

唔覺以見到某銀行請 marketing position, 又冇特別注明工作經驗,

就噤入去望下啦...

心諗,用呢個做例去寫嗰cover letter 先。

望望吓,有login 地方?

咁順便註冊啦。

填好資料同upload咗resume上去,

就彈咗幾條問題出嚟,咁又順手填埋(心諗有 back 掣可噤)。

之後居然彈咗句" Thank you for applying for the job."。

唔....點算好呢,人生第一份resume 就係咁求其順手俾咗人。

希望有好消息啦,當然期望不大。

又,講返莫卡小王子先。

由於佢王子嘅關係,所以佢好唔鍾意坐/瞓地下。

話說有一日我放咗我嘅蘋果响梳化就去包水餃食,

包包吓就覺得點解屋企咁靜嘅?

一望,王子跳咗上梳化上網(笑)。

下圖係佢原本睇緊我嗰blog

坐姿具有皇者風範。

影到無聊將佢變咗巧克老公主(笑)。

莫卡王子出巡

難得今日天氣好,無落雨同唔係太凍,

估計莫卡王子願意郁動佢嘅金身金腳,

所以帶咗佢出巡。

話說王子佢由細到大都好保護自己。 

首先,原本趁佢初初出街嘅時候想教佢避任何鐵蓋(manhole cover)。

因為多倫多每年都會有一、兩隻狗行上 manhole cover 而電死咗。

最近先發生過一隻金毛落雨散步行正manhole cover ,又咁啱附近TTC漏電,所以...

好啦,返回正題,王子佢未學已經自動繞路而行,

就算你迫佢,佢會跳過或者企响到等,萬試萬靈(笑)。

又,佢更唔鍾意嘅係整濕自己。

見到地下太濕佢會企定定唔行。

如果有一灘灘水,佢又係跳過去或者等奴婢抱(笑)。

謝天謝地,佢行足全程(笑)。

註:條Collar 唔係用於防止佢咬人或狗,而係帶佢出街時唔會扯痛佢條頸啫。

佢仲係可以咬樹葉架。

老公主時裝展-3

第三個造型:

日本浴衣

盡顯少女情懷

有特大粉紅蝴蝶結一個,

係咪好可愛呢?

突然覺得巧克好似斯文咗(笑)。

雖然我最鍾意嘅都係蜜蜂裝....但呢件都唔錯嘅。

一年一度嘅時裝展完滿結束,多謝模特兒全力協助。

老公主時裝展-2

第二個造型:

恐龍裝

好鬼搞笑,尤其係條尾(笑)。

每張相都略帶一絲悲傷嘅眼神....

事緣未着好件衫我就被人叫走咗入廚房

一路開心地傾計嘅時候,一路諗點解巧克公主咁靜唔過嚟八掛嘅?

原來...我未整好頂帽,所以佢睇唔到路郁唔到(笑)。

因為咁佢走咗去室友嗰邊哭訴,然後迫不得以俾人推番去我呢邊影相...

老公主背影,件衫又係窄過頭。

肥龍,哈!

老公主時裝展-1

話說突然興起想同老公主巧克影純影集,

所以搵咗屋企有嘅衫幫佢做個Fashion Show。

第一個做型:

嗡嗡嗡、小蜜蜂

呢套服裝完全表現到佢可愛嘅一面(笑)。

其實件衫都有DD窄.....

又其實着耐咗老公主開始有D唔高興,

特別係望住零食响相機上面十幾分鐘又食唔到嗰吓(笑)。

小兔與小狗

小兔係响幾年前嘅聖誕節被領養返屋企嘅。

佢係男仔,不過真實年齡不詳。

聽講佢係同十幾隻兔BB一齊放响Humane Society門口...可憐的小兔。

小狗未嚟前佢一直都當屋企係佢地頭。

自出自入,得閒曬太陽啦,捐入梳化底,咬吓電線咁。

日光浴下瞓覺中 

好景不常,邪惡嘅 Moka 降臨咗呢個世界...

食得未呀? By 八個月大嘅Moka

莫卡先生:

迷你臘腸一條隻

純正德國血統 

狩獵獾、兔仔等小型動物

我係邪惡小王子! (笑)

自此以後,小兔生活不再優閒。

每日小兔都被小王子响城堡外突襲,繼而破門而入正面衝突,

輕則搶食搶地搶屎(爆), 重則動武。

好彩小兔非等閒之輩 (曾跟大量小兔大兔入住 Humane Society混過)

關鍵時刻施以"呼呼功"及利甲反抗,然後跳入大殿(大殿對小王子嚟講太細所以入唔到)

呢個時候救兵亦到達驅趕小王子。

世界大戰結束,一個鐘後再開過火 (笑)。

輕鬆的一天

今日day-off。

先去做運動,再返皇宮發呆。

見到可憐嘅老公主巧克响門外慘叫悲鳴，決定邀請佢陪我發呆(笑)。

公主的確識嘆,攤响全場最佳位置曬太陽...

嘆到隻腳都突出嚟。

見佢長時間地認真咁眺望遠方,應該諗緊國家大事幾點食下午茶(笑)。

又諗住打開門吸收下新鮮空氣啦,老公主拼死走出露台。

去啦去啦,你都唔夠高去尋死嘅 (笑)。

行吓行吓居然同我瞓响露台曬太陽 !?

你有幾多細菌要射死呀?

你要曬就曬到夠啦,我無你咁多毛,入番皇宮去取喛,哼。

食 tea 後,老公主要求出街辦私事。

得!你辦你嘅、我影我嘅。

話說已經三月啦....點解仲會落雪呢?