第五日

今日下午出小小太陽,就帶咗兩隻去玩。

去到一個大草地就放咗識聴名返歸嘅公主自己跑。

不過,佢一路跑一路吠,仲為咗追飛機而差D跑出馬路...

嚇死人啦,好彩跑到一半就跑番嚟,不過我以後都唔會再放你!

直到今日,佢地仍然係唔鍾意對方。

應該話公主依然好憎王子...

又,今日煮咗糖醋排骨同沙茶菜心。

嗰排骨煮得好好,不過油咗D,但味道好得!

第四日

今日落雨,王子無得出街。

只有公主自己一個因為要出街去廁所而出街。

今日好瘋狂。

王子同公主係咁爭同一舊骨頭咬...

明明已經有兩舊骨啦,硬係要見到人地咬住嗰舊要去搶。

最後公主就會發脾氣想咬王子,而王子又不甘示弱想吠同咬返轉頭...

結果要將兩隻野分開,一隻响廚房,一隻leash 咗响大廳,

仲要長期睇住佢地,避免兩個再打架。

希望佢地快D 愛上對方啦(笑)!

送上是日晚餐

魷魚仔

唔記得係咩口味,但煮得好好。

仲有

紅咖哩炆牛尾

超淋!而且好入味!

第三天

第三日

今日兩個依然係狗咬狗骨,

一個想玩,另一個就唔想玩,

一個繼續撩人玩到發脾氣,另一個就被激到發脾氣。

唉,幾時先可以和平相處呀?

一個咬骨,另一個望住人咬骨

試圖撩人玩嘅王子,

不過失敗兼令公主露齒發火...

下午帶住兩隻野去行咗一鐘同去PetsValu 買collar俾王子。

佢嗰條已經爛爛地同會跌出嚟。

買咗條紫色連胸嘅俾佢,亦都用買collar嘅錢上咗寶貴嘅一課:

原來屋企嗰條被認為太細嘅一模一樣嘅collar一直都被用錯咗....

所以先唔啱帶(哭)。

宜家有兩條collar 有排用啦王子!