聯記

今日朝早去咗換呔,等咗少於一個鐘左右就換完,

然後去咗First Markham Place 食午餐。

聯記曾經係我地嘅飯堂....不過好快就食厭咗啦...

今次叫咗兩個客飯,

川味炆蘿蔔牛腩

少辣,牛腩同蘿蔔都好淋,

要挑剔嘅係蘿蔔太少唔夠喉。

另一個客飯係宮保雞丁

比牛腩仲辣D,對我嚟講真係辣。

雞有被化學物質招待過,而且用嘅係炸花生而唔係腰果...

不過都OK嘅。

最好嘅係食客飯係送例湯同餐飲架!

個例湯都幾足料同無味精,

而餐飲就因為用咗嚟解辣...所以無認真試味。

地址: First Markham Place

  消費: $8.5 / person
味道: 2.9    /5

服務: 3      /5

整體:2.9  /5

第七日

相處第七日,

感情依舊咁一般...

如果唔係我迫王子瞓响公主隔離,呢張唔會影到。

不過佢其實都唔係好願意影,

一個啤人,一個唔想理人。

影到不耐煩,王子走開去伸懶腰...

下午去咗公園玩。

前幾日落嘅雨令到成個地都係濕泥濘,

王子佢企圖跳左跳右去避污泥,當然失敗啦,

咁多邊避得曬呀(笑)。

最後兩隻野用咗我十幾分鐘去抹腳....

又,今晚煮咗麻油雞同涼拌茄子,

麻油雞依舊有水準,

之於涼拌茄子個汁唔係我整嘅,不過都好好味!

第六日

今日仍然係全天候落雨天,

所以兩隻野成日都留响屋企...

感恩嘅係公主同王子一樣80%都係瞓覺..

一個瞓梳化一個瞓地下

只要我一日唔郁,佢地就可以瞓到天荒地老。

而且佢地嘅感情好似好咗...

例如八卦嘅時候大家嘅動作、眼神都好一致...

雖然呢件唔係好事..因為要趕佢地一齊走(笑)。

但望住佢地同一時間偷入廁所抬頭望雨褸嗰一吓,真係又好嬲又好笑。

瞓嘅距離近咗啦!

又,今晚煮咗瓜仔肉同欖菜百合炒豆角。

瓜仔肉唔夠味,下次要放膽落重手D調味,

而豆角就炒得好好!