話說老公主上個星期八歲生日,所以前室友決定搞個小小派對慶祝,
參加人數只有三個,而狗就有兩隻-王子與公主。
派對內容包括去Off-leash area 玩到死,用哂力後任食生日批食到飽。
因為响曬到爆嘅兩點半到,所以Off-leash area 只有大狗兩隻,都好過無。
其中一隻係叫Panda嘅husky,睇佢嘅貪玩程度同毛,估計係一隻未夠一歲嘅BB。
未入到去Panda已經响門口等我地,然後互聞一番,最後選中莫卡王子做玩伴。
兩隻追嚟追去玩到王子成身都係人地嘅口水。
至於老公主就走圍行搵食,又或者追住兩隻跑緊嘅狗吠。
去到中段有位姨姨主動叫佢隻金毛行去我地到傾計。
隻金毛已經歲半啦,但仲係好瘦,比王子仲瘦,而且唔多鍾意玩,
佢同公主一樣鍾意俾人摸多過同狗玩,兩個都好enjoy陌生人摸。
最估唔到連驚陌生人嘅王子都願意反轉個肚仔俾人摸!?
玩到無力就搵咗張凳坐低,狗有狗食,人有人食。
室友買咗個生日批俾公主同王子齊齊分享。
王子食到一半已經飽到走開咗,剩低嘅响公主食完自己嗰份後搶咗去食。
題外話,嗰批真係好飽肚,王子食咗之後飽咗兩日,連飯都唔想食。
食完嘢大家都覺得好熱,就決定去麥當勞飲$1 凍飲。
一路坐响patio睇住兩隻狗瞓覺,一路談天說地,人生一樂也。
